Mbrëmjen e kaluar reshjet e dëborës kanë përfshirë juglindjen e vendit, të cilat kanë qenë të dendura në lartësitë mbi 1200 metër mbi nivelin e detit.
Raportohet se në Korçë dëbora shkoi deri në 7 cm, ndërkohë që është punuar për pastrim dhe kriposje edhe në akset nacionale që u përfshinë nga reshje.ARRSH njofton se borëpastrueset kanë qenë në terren në akset Korçë-Pogradec, Pogradec-Qafëthanë dhe në aksin Korçë-Erseke në Qafën e Qarrit.
Fatmirësisht nuk ka pasur probleme me qarkullimin e automjeteve, por drejtuesit e mjeteve apelohet që të qarkullojnë me zinxhirë dhe te tregojnë kujdes të shtuar. Të gjitha akset nacionale dhe rrugët dytësore janë të kalueshme dhe pa probleme.
