I ftohi siberian që ka mbërthyer vendin tonë ka sjellë probleme në qarkullimin e mjeteve.
Ministria e Mbrojtjes sipas një njoftimi zyrtar ka bërë publike të dhënat më të fundit për motin e keq, rrugët problematike ku qarkullohet me vështirësi dhe akset nacionale të hapura.
Të gjitha akset kombëtare janë të hapura sipas të dhënave të Agjencisë Kombëtare të Mbrojtjes Civile, ndërsa vetëm disa rrugë në zonat e thella malore qarkullohet me vështirësi.
Në disa fshatra në Dibër, Kukës dhe Korçë ka pasur probleme me energjinë elektrike për shkak të erës së fortë.
Mësohet se ARRSH dhe OSHEE janë në terren për të rikthyer normalitetin në këtë zona që janë të mbuluara nga dëbora.
Njoftimi:
Grupet e punës, nga emergjencat civile vendore në koordinim me Agjencinë Kombëtare të Mbrojtjes Civile, forcat e Policisë së Shtetit, Autoriteti i Rrugëve, OSHEE kanë ndjekur me vëmendje situatën e krijuar gjatë ditës së djeshme dhe vijojnë të jenë në terren për të shmangur të gjitha problematikat e krijuara si pasojë e reshjeve të dendura të borës në disa zona në veri të vendit dhe reshjeve të shiut në pjesën tjetër të territorit.
Në qarkun e Kukësit, trashësia e borës në zonat e thella malore ka kaluar mbi 20 cm, por rrugët nacionale kanë qenë të qarkullueshme me zinxhirë. Nga subjektet kontraktore është punuar gjatë gjithë kohës për pastrimin, kriposjen dhe mbajtjen funksionale të rrugëve që kanë kontratë. Në disa rrugë në zona të thella rekomandohet lëvizja me zinxhirë. Furnizimi me energji elektrike është normal në të gjithë territorin e Qarkut Kukës, përveç njësive administrative Shishtavec, Topojan, Zapod, Malzi, Kolsh, Surroj, Ujmisht, Bushtricë, Grykë-Çajë, Kalis dhe Arrën, bashkia Kukës; njësive administrative Golaj dhe Gjinaj, bashkia Has; njësive administrative Tropojë e Vjetër, Bytyç dhe Llugaj, bashkia Tropojë.
Në qarkun e Shkodrës, reshjet e borës të rëna në zonat malore të bashkisë së Shkodrës, Malësi e Madhe dhe Fushë-Arrëz kanë bërë që në disa akse të kalohet me vështirësi dhe me zinxhirë për shkak të prezencës së dëborës dhe ngricave. Të hapura janë akset Kir-Shosh në Malin e Shoshit, ku ka patur një trashësi të dëborës rreth 30 cm. Po ashtu është hapur me shpejtësi edhe aksi rugor Bogë-Theth, ku kanë vijuar punën mjetet borëpastruese.
