Prej disa ditësh, prishja e Teatrit Kombëtar është një nga temat më të diskutuara mes artistëve, qytetarëve dhe politikës shqiptare.
Pak minuta më parë, kryeministri Edi Rama ka reaguar sërish në rrjetin social Facebook, ku vazhdon të insistojë se Teatri do shembet.
Rama ka postuar deklaratën e regjisorit Altin Basha, ku shprehet se kjo gërmadhë duhet të shembur për t’u ndërtuar Teatri i Ri Kombëtar.
Edhe pse shumë artistë, profesorë e qytetarë po protestojnë prej disa ditësh para godinës së Teatrit Kombëtar, kundër prishjs së tij, mesa duket kryeministri Rama nuk tërhiqet nga vendimi i tij.
“Regjizori Altin Basha, një ndër emrat më të spikatur të gjeneratës së re të krijuesve të skenës, mbështet njësoj si shumica dërrmuese e komunitetit teatror shqiptar, ndërtimin e Teatrit të Ri Kombëtar dhe shembjen e gërmadhës ekzistuese.
ALTIN BASHA:
Qartë dhe shqip, unë mendoj se duhet një godinë e re. Pjesa muzeale mund të zgjidhet brenda godinës së re. Si regjisor, po ju deklaroj me përgjegjësi, se ajo godinë nuk ofron mundësinë për zhvillimin e një krijimtarie cilësore teatrore dhe, për rrjedhim, një cilësi të ulët produkti për spektatorët dhe qytetarët”, shkruan kryeministri Edi Rama në Facebook.
