Opozita i kërkoi mazhorancës një formulë të re për Komisionin Qendror të Zgjedhjeve, e cila u bë publike për mediat ditën e djeshme.
Në këtë mënyrë Opozita jashtë paralmentare kërkoi që PS-së të shpjegojë se me cilën pjesë të propozimit nuk është dakord dhe arsyet pse, në mënyrë që të arrihet dakordësia e 5 Qershorit.
Kjo kërkesë e opozitës vjen pasi kjo e fundit nuk pranon draftin aktual të Partisë Socialiste për emërimin e të gjithë anëtarëve të KQZ-së nga qeveria duke i hequr në këtë mënyrë opozitës garancitë ekzistuese, në lidhje me propozimet dhe vendimarrjen.
“Theksojmë se garancitë ekzistuese për procesin zgjedhor të tilla si vendimmarrja me shumicë të kualifikuar aktualisht në fuqi në Kod, duhet të ruhen dhe nuk mund të zvogëlohen apo hiqen. E kundërta do të përbënte një hap prapa në kohë dhe standarte. Është e pashpjegueshme sesi PS kërkon të zhbëjë garanci që ekzistojnë aktualisht në Kodin Zgjedhor, mbi përcaktimin konsensual nga KQZ të rregullave të garës elektorale,”– thuhet në përgjigjen e opozitës.
Duke theksuar se propozimi i saj është në përputhje me dakordësinë e 5 Qershorit, opozita i ka kushtuar rëndësi të veçantë formulës që garanton pavarësinë.
“E kemi të paqartë qëndrimin tuaj se kjo formulë e propozuar nga opozita për KQZ e cila është e njëjtë si ajo që përdorim për organet e reja të drejtësisë, sjell politizim ndërkohë që ju mbroni versionin se kandidatët për KQZ duhet të jenë propozime nga grupet parlamentare apo deputetë të veçantë, çka, në fakt, përbën politizim tërësor të kandidaturave.”
Shkruhet në reagimin e opozitës, e cila tani pret nga PS shpjegime për refuzimin e kësaj formule dhe një propozim të ri.
