Një nga 69 shqiptarët e kapur të fshehur në një anije peshkimi në afërsi të Norfolk, është i dënuar për vrasje.
Një anije peshkimi 100 tonëshe, që lundronte nga zona Ostend e Belgjikës, u ndoq nga Forca Kufitare e Britanisë së Madhe dhe u dërgua në Harwich muajin e kaluar. Emigrantët shqiptarë u gjetën të fshehur në bord. Sekretarja e Brendshme Priti Patel falënderoi autoritetet dhe emigrantët u akuzuan për hyrje të paligjshme në vend. Disa prej tyre u deklaruan menjëherë fajtorë, ndërsa të tjerët janë në pritje të plotësimit të dokumentacionit. Autoritet britanike thanë se një nga ata që ishin në anije kishte një dënim për vrasje.
Ai ishte liruar nga një burg i sigurisë së lartë në Shqipëri në janar pasi përfundoi një dënim 15-vjeçar për vrasjen e një gruaje në shtëpinë e saj në 1997 pas një debati. Vajza e saj tetë vjeçare ishte dëshmitare e të shtënave.
Kuptohet që njeriu, të cilin Sunday Express nuk e identifikon, tani është në një qendër për pritjen e emigrantëve. Nuk dihet nëse ai ka aplikuar për azil. Ministria e Brendshme nuk pranoi të konfirmonte nëse ishte në dijeni të dënimit të tij.
Megjithëse vdekja e 29 vjeçares u regjistrua si një vrasje, ajo nuk u hetua siç duhej në atë kohë pasi Shqipëria po kalonte një periudhë trazirash me një mungesë të burimeve policore.
Prokurorët shqyrtuan çështjen në 2006 dhe burri u akuzua për vrasjen pasi trupi u zhvarros. Ai fillimisht u shpall i pafajshëm në vitin 2008. Por, në një gjykatë apeli në 2009 e përmbysi vendimin dhe ai u dënua me 15 vjet në burgun e sigurisë së lartë Rrogozhinë.
Alp Mehmet, kryetari i Migration Watch UK, i cili bën fushata për kontrolle më të rrepta të kufirit, e përshkroi si tronditës faktin se një i dënuar për vrasje u fut në vend.
“Mjerisht, këto ngjarje tregojnë se interesat dhe siguria e publikut që i bindet ligjit, janë më pak të rëndësishme sesa të drejtat e diskutueshme të atyre, krimet e tmerrshme të të cilëve, duhet të diktojnë largimin e tyre”, deklaroi Mehmet.
Një zëdhënës i Ministrisë së Brendshme tha se “Ne jemi të zhgënjyer që procedurat kundër 69 personave të akuzuar për hyrje të paligjshme do të ndërpriten dhe ne po punojmë për të zgjidhur çështjet e ngritura nga ky rast. Ne ua refuzojmë statusin e refugjatit atyre që kanë kryer krime të rënda dhe janë një rrezik për komunitetin. Ata që nuk kanë të drejtë të qëndrojnë në Mbretërinë e Bashkuar do të largohen sa më shpejt të jetë e mundur.”
Ai shtoi se “Të gjithë azilkërkuesit i nënshtrohen kontrolleve të sigurisë për të identifikuar ata që mund të jenë përfshirë në kriminalitet.”
/GazetaReforma.com/
