Zgjedhjet e ardhshme lokale pritet te mbahen vitin që vjen, teksa president i ri në detyrë, Bajram Begaj ka nisur me procedurat për dekretimin e datës.
Në shkresën dërguar Komisionit Qendror të Zgjedhjeve, Kreu i Shtetit kërkon t’i vihet në dispozicion vendimi për shpalljen rezultatit final për zgjedhjet e organeve të qeverisjes vendore, mbajtur në 2019.
“Presidenti i Republikës, në ushtrim të kompetencës së parashikuar në pikën g, të nenit 92, të Kushtetutës dhe pikën 1, të nenit 10, të ligjit nr. 10019, datë 29.12.2008 “Kodi Zgjedhor i Republikës së Shqipërisë” i ndryshuar, do të caktojë me Dekret datën e zgjedhjeve per organet e qeverisjes vendore.
Duke marrë në konsideratë rëndësinë dhe interesin e lartë që kanë zgjedhjet vendore në Republikën e Shqiperisë, kërkojmë vënien në dispozicion nga ana juaj, të vendimit “Për shpalljen e rezultatit përfundimtar të zgjedhjeve për organet e qeverisjes vendore” të vitit 2019”, -thuhet në shkresën drejtuar KQZ, e që mban firmën e drejtorit të ri të kabinetit në Presidencë, Eduart Seitaj.
Vlen të theksohet se data e shpalljes së këtij vendimi përkon me datën e fillimit të mandatit të kryetarëve të bashkive që dolën nga këto zgjedhjve. Sipas Kodit Zgjedhor, kjo datë duhet të jetë mes 15 marsit dhe 15 majit.
Data e zgjedhjeve të reja vendore, që pritet të mbahen në vitin 2023, nuk duhet të jetë më shumë se 9 muaj më vonë nga mbarimi i kryebashikakëve aktual.
