DURRËS
Policia vazhdon me dorë të hekurt “luftën” ndaj organizimit të dasmave në kohë pandemie, duke gjobitur me shuma të majme pronarët e lokaleve që organizojnë evente të ndryshme festive.
Uniformat blu të qytetit bregdetar kanë lajmëruar se kanë gjobitur me 10 milionë lekë të vjetra një pronar në Durrës, që organizonte dasma, ndërsa është mbyllur një lokal në Krujë.
“Policia e Durrësit vijon kontrollet për monitorimin e zbatimit të masave kufizuese, me qëllim parandalimin e përhapjes së COVID-19. Gjatë kontrolleve të fundit, policia ka ndëshkuar me masë administrative 1.000.000 lekë administratorin e një subjekti në Durrës, pasi u konstatua duke ushtruar aktivitet në kundërshtim me Aktin Normativ.
Gjithashtu në bashkëpunim me Inspektoriatin Shtetëror Shëndetësor, u bë mbyllja e aktivitetit të 1 subjekti në Krujë.
Shërbimet e Komisariatit të Policisë Durrës, në vijim të kontrolleve të ushtruara në subjekte të ndryshme, kanë konstatuar një subjekt (lokal), në administrim të shtetasit S. T., cili është konstatuar duke ushtruar aktivitetin e tij në kundërshtim me Aktin Normativ, duke mos respektuar protokollet e sigurisë. Për këtë subjekt, shërbimet e Policisë kanë vendosur masë administrative 1.000.000 lekë.
Gjithashtu shërbimet e Komisariatit të Policisë Krujë në bashkëpunim me Inspektoriatin Shtetëror Shëndetësor, kanë vendosur mbylljen e aktivitetit në subjektin në pronësi të shtetasit Xh. B., i cili pasi është ndëshkuar me masë administrative nga shërbimet e Policisë, ka organizuar ceremoni martesore në kundërshtim me Aktin Normativ, në mënyrë të përsëritur.
Policia e Durrësit do vijojë kontrollet në të gjithë territorin e Qarkut Durrës dhe apelon për të gjithë pronarët/administratorët e subjekteve që ushtrojnë aktivitet, të respektojnë me rigorozitet protokollet e sigurisë dhe masat kufizuese, me qëllim parandalimin e përhapjes së COVID-19”, thuhet në njoftimin e policisë.
Në lidhje me këto masa ekonomike të rënda, pronarët e lokaleve kanë reaguar të pakënaqur, duke thënë se janë duke iu shkaktuar shumë pasoja ekonomike.
Pronarët ankohen se fitimet e tyre janë pikërisht në organizimin e dasmave dhe në kohën që zhvillohen të tilla evente, policia i gjobit me shuma të konsiderueshme, shpesh herë të larta për realitetin shqiptar.
