Gjatë një intervistë për median kosovare “T7”, kryeministri i Kosovës, Ramush Haradinaj ka treguar se shefi i qeverisë Edi Rama ka qenë iniciatori i mbledhjes së liderëve shtetërorë të Kosovës më datë 4 shkurt në shtëpinë e presidentit Hashim Thaçi.
Haradinaj u shpreh se fillimisht ideja ishte që takimi të ndodhte në Tiranë, por më pas ndodhi në Prishtinë.
Ai tha se ka qenë një bisedë dinjitoze ku është folur për taksën serbe, dialogun Kosovë-Serbi dhe opsionet e zgjidhjes finale.
Kryeministri Haradinaj bëri të ditur se Rama ka shprehur mendimin e tij për heqjen e taksave ndaj mallrave të importuara serbe e boshnjake, por që kjo nuk ka ndikuar aspak në ndryshimin e qëndrimit të tij.
“Kryeministri Rama kërkesa s’mundet me pas, pasi ai qeveris me Shqipërinë, por mundet me pas qëndrim të vetin i cili është i respektueshëm. Kërkesa s’mundet me pas askush. Ai kishte mendimin e vetë që është mirë me u pezullu taksa”-tha Haradinaj në emisionin ‘Pressing’ në “T7”.
“Rama mos t’i japë vetes ngarkesë se ne jemi këtu”– vijoi ai.
