Shkalla e lartë e vaksinimit të Danimarkës ka mundësuar që ajo të bëhet një nga vendet e para të BE-së që heq të gjitha kufizimet e brendshme, pas 548 ditësh me frenime në vend për të kufizuar përhapjen e Covid-19,
Kthimi në normalitet ka qenë gradual, por që nga e premtja, leja dixhitale – një dëshmi nëse një person është apo jo i vaksinuar – nuk kërkohet më për të hyrë në klube nate, duke e bërë atë kufizimin e fundit të pandemisë që bie.
Më shumë se 80% e njerëzve mbi moshën 12 vjeç në vendin skandinav kanë bërë dydoza , duke bërë që qeveria daneze të deklarojë që nga mesnata se nuk e konsideron më Covid-19 një sëmundje “kritike shoqërore”.
“Nuk do të thoja që është shumë herët. Ne kemi hapur derën por kemi thënë gjithashtu se mund ta mbyllim nëse është e nevojshme”, tha Søren Riis Paludan, një profesor i virologjisë në Universitetin Aarhus në qytetin e dytë më të madh të Danimarkës.
Pika e kthesës në Danimarkë për të filluar lehtësimin e kufizimeve erdhi kur shumica në grupmoshën 50+ i bëri të dy dozat, tha Riis Paludan.
Që nga 14 gushti, mbajtja e maskave në transportin publik nuk është më e detyrueshme. Më 1 shtator, klubet e natës u rihapën, kufizimet në tubimet publike u hoqën dhe nuk ishte më e detyrueshme të tregosh lejen për t’u ulur brenda restoranteve, për të shkuar në ndeshje sportive, palestra ose ambiente të tjera.
