Pas motit të keq, reshjeve të shumta, dhe vërshimeve në shumë zona të Kosovës, një prej komunave (bashkive) më të prekura nga përmbytjet, Komuna e Vushtrrisë, ka shpallur gjendjen e jashtëzakonshme.
Kreu i kësaj komune, Xhafer Tahiri deklaroi se reshjet e fundit kanë bërë që Lumi Llap dhe Drenica të rrisin jashtëzakonisht shumë prurjet në Lumin Silnica, e cila me vërshimet e saj po rrezikon Vushtrinë dhe fshatrat./Gazetareforma.com/
Njoftimi i plotë:
Për shkak të rrezikut nga vërshimet nga Lumi Silnica, kam marrë vendim të shpallë gjendje të emergjencës civile në Vushtrri!
Reshjet e fundit kanë bërë që Lumi Llap e Drenica të rrisin jashtëzakonisht shumë prurjet më Lumin Silnica që rrit rrezikun e vërshimeve në Qytet dhe fshatrat e Vushtrrisë.
Kam urdhëruar rritjen e gatishmërisë maksimale të gjitha ekipeve emergjente komunale.
Pikat kritike pritet të jenë vendbanimet përgjatë Lumit ‘Silnica’, Qyteti i Vushtrrisë, Pestova, Prelluzha, Lumi i Madh, Nedakoci.
Janë kontaktuar kryetarët e fshatrave dhe janë këshilliar banorët afër lumit Silnica që sonte gjatë gjithë natës të kenë kujdes maksimal. Mundësisht të largohen njerëzit dhe makineritë nga ato shtëpi që zakonisht kanë probleme në rast të vërshimeve.
Palestra në Samadrexhë është caktuar si vend për strehim në rast nevoje. Po ashtu edhe objektet tjera si shkollat po bëhen gati për këtë qëllim.
Janë mobilizuar ekipet në QKMF, Zjarrfikësit dhe Policia.
Kërkojmë bashkëpunim e mirëkuptim të qytetarëve në këtë situatë të emergjencës natyrore.
Ju lutemi me kujdes maksimal dhe pa panik.
Xhafer Tahiri
