Astrit Thaçi i njohur ndryshe si “i forti i Durrësit” u arrestua ditën e shtunë, pasi grabiti një argjendari në lagjen “Aqif Pasha” në Elbasan.
Pas arrestimit të tij, Policia e Shtetit njoftoi se Thaçi ishte i përfshirë në një sërë grabitjesh në disa qytete, si edhe ka qenë i dënuar me 6 vite burg në Itali.
Së fundmi, ABC News ka siguruar videon e kamerave të sigurisë së argjendarisë ku ndodhi grabitja, e gjendur vetëm disa metra larg Drejtorisë së Policisë së Elbasanit.
Në pamjet e publikuara shihet Astrit Thaçi, i cili ka veshur një xhup të zi, pantallona të zeza, atlete të bardha dhe një pulovër të kuqe dhe hyn në argjendari si blerës normal.
Ai përshëndet pronaren dhe i kërkon asaj një unazë dhe pasi provon disa, 27-vjeçari nxjerr pistoletën nga brezi dhe i kërkon që të mos lëvizë, ndërsa ajo tenton të largohet.
Thaçi fillon të marrë bizhuteritë e arit që gjenden në banak duke i futur nëpër xhepa, por ndërkohë le në mënyrë të pakujdesshme pistoletën në banak.
Duke shfrytëzuar këtë moment gruaja merr pistoletën dhe largohet nga dyqani e ndjekur nga Astrit Thaçi me vrap.
Ajo bërtiste duke kërkuar ndihmë dhe futet në një lokal ngjitur me argjendarinë, ku menjëherë ka mbërritur për të ndihmuar një oficer i policisë që gjendej tek dera e Drejtorisë së Policisë së Elbasanit.
Thaçi u ndihmua për tu larguar nga vendngjarja me një makinë që drejtohej nga një 20-vjeçare, e cila u arrestua ditën e djeshme në Tiranë.
