Ditën e djeshme në Shqipëri u mbajtën zgjedhjet lokale, ku Partia Socialiste është fituese e të gjitha bashkive edhe pse në disa qytete nuk ka mbaruar plotësisht procesi i numërimit të votave.
Ky rezultat nuk ka qenë aspak surprizues, por në këtë proces votimi nuk kanë munguar as anomalitë.
Ndërkohë që në disa prej bashkive të vendit numërimi i votave vijon ende, në Bashkinë e Urës Vajgurore ka përfunduar.
Referuar të dhënave zyrtare të KQZ-së, rezulton që në këtë bashki, kandidatja Juliana Memaj ka marrë më shumë vota se numri në total i votuesve.
Sipas shifrave të KQZ, në Urën Vajgurore pjesëmarrja ka qenë 19.18% ose 5900 votues. Sipas të njëjtave të dhëna nga KQZ, në këtë bashki numërimi ka përfunduar dhe kandidatja Juliana Memaj ka fituar me 7666 vota, pra 1766 vota më shumë se numri i votuesve në total.
