Deri tani numri i të infektuarve nga COVID-19 në vendin tonë mbetet i pandryshueshëm, teksa mbrëmjen e sotme janë parë dy persona që transportohen me ambulancë në Spitalin e Infektivit, pikërisht aty ku gjendet karantina.
Ministria e Shëndetësisë prej disa ditësh ka vendosur në dispozicion numrin 127, ku duhet të telefonojnë të gjithë qytetarët, nëse paraqesin ndonjë nga simptomat e virusit, veçanërisht temperaturë, simptoma respiratore si kollë dhe vështirësi në frymëmarrje apo diarre.
Ditën e djeshme bëri bujë të madhe mosndërgjegjësimi i qytetarëve, që frekuentuan si zakonisht lokalet dhe vendet publike, ndërkohë ditën e sotme situata është paraqitur më e stabilizuar.
Mirëpo, kur të gjithë menduan se shqiptarët e kanë kuptuar seriozitetin e pandemisë, drejtori i Urgjencës Kombëtare na vërtetoi të kundërtën.
Në një lidhje telefonike për emisionin ‘Open’, Skënder Brataj deklaroi se qytetarët telefonojnë në numrin 127 për kërkesa të çuditshme që nuk kanë lidhje me situatën aktuale, nisur nga problemet me target e makinave tek ankesat për fqinjët apo Ramën.
“Njerëzit kanë marrë 127 për çdo lloj gjëje, deri dhe te targat e makinës. Një tjetër tha jam nga Shkodra kam 30 min që marr në tel pse më del Rama në tel. Tjetri thoshte komshinjtë e mi kanë dyqnin hapur kur do vini t’ia mbyllni.”- tregoi ai.
Ju kujtojmë se deri tani Coronavirusi ka marrë 4, 969 jetë njerëzish dhe ka infektuar 134,327 të tjerë në 125 shtete, teksa dje OBSH e shpalli COVID-19 pandemi.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
