Pas Bekim Balajt, edhe Odise Roshi ka vendosur t’i japë lamtumirën kombëtares shqiptare.
Mesfushori 33-vjeçar, ka qenë një figurë e rëndësishme për ekipin kombëtar, duke zhvilluar gjithsej 70 ndeshje dhe shënuar 5 gola.
Debutimi i tij ka ndodhur më 7 tetor të vitit 2011, dhe ndeshja e tij e fundit me kuqezinjtë ka qenë miqësorja kundër Italisë, e zhvilluar në stadiumin “Air Albania”, që shënoi edhe fundin e mandatit të trajnerit Edi Reja.
Me trajnerin brazilian Sylvinho, Roshi u grumbullua vetëm një herë, në ndeshjen e fundit ndaj Polonisë në eliminatoret e Kampionatit Europian, ku Shqipëria fitoi 2-0, por mesfushori nuk luajti asnjë minutë. Ky vendim për t’u tërhequr nga kombëtarja erdhi pas atij të Bekim Balajt, me të cilin Odise Roshi ka një miqësi të fortë dhe është shok skuadre i gjatë.
Për të dy lojtarët do të organizohet një ceremoni përmbyllëse të karrierës në ndeshjen e ardhshme të Shqipërisë, më 16 nëntor në “Arena Kombëtare”, ku kuqezinjtë do të përballen me Republikën Çeke në kuadër të Ligës së Kombeve.
