Pandemia e Covid vijon ende të regjistrojë raste të reja dhe viktima, ndërsa përbën edne rrezik. Sipas një studimi të ri, njerëzit që vuajnë simptoma të tejzgjatura nga koronavirusi mund të kenë dëmtime të fshehura në mushkëri.
Një ekip shkencëtarësh i financuar nga NIHR, Oxford, Sheffield, Cardiff dhe Manchester kreu një studim të vogël pilot i cili ekzaminoi mushkëritë e 11 personave që vuanin nga simptoma të gjata Covid, duke përdorur një skanim të ri me gazin ksenon. Skanimi përdoret për të zbuluar çdo anomali brenda mushkërive, të cilat nuk mund të zbulohen nga skanimet rutinë si rrezet X dhe skanimet CT.
Për të krahasuar skanimet e gazit ksenon kundrejt testeve të tjera të funksionit të mushkërive u përdorën 3 grupe pacientësh. E para përfshinte njerëz që kishin përjetuar gulçim afatgjatë si rezultat i kontraktimit të koronavirusit, por që nuk kishin kërkuar shtrimin në spital.
E dyta ishte një grup prej 12 personash që e kishin kaluar Covid para shumë kohësh, por ishin shtruar në spital dhe kategoria e tretë u formua nga 13 njerëz të shëndetshëm. Të gjithë pjesëmarrësit iu nënshtruan një skanimi të rezonancës magnetike (MRI), ndërsa thithnin gaz ksenon, i cili i ndihmoi studiuesit të ‘shikonin’ vizualisht se sa mirë lëvizte gazi nga mushkëritë në rrjedhën e gjakut.
