Shqipëria ka forcuar masat në kuadër të festave të fundvitit. Ky lajm u bë i ditur nga ministrja e Shëndetësisë, Ogerta Manastirliu e cila ka dhënë një deklaratë për shtyp bashkë me disa prej anëtarëve të Komitetit Teknik të Ekspertëve.
Ora policore duke nisur nga data 24 dhjetor, do të nisë në orën 20:30 deri në orën 6 të mëngjesit, dhe do të zgjasë deri në datën 4 janar.
Kufizime nga ora 20 e 30 deri në 6, duke nisur nga data 24 Dhjetor deri në 4 Janar. Prej datës 5 Janar kufizimi rikthehet në orën 22:00. Kufizimi i aktiviteteve të vareve dhe restoranteve fastfood dhe bareve duke filluar nga ora 20 e 30 deri në 6 të mëngjesit. Përjashtim bëjnë emergjencat shëndetësore, apo lëvizjet për arsye pune, ku qytetarët do të pajisen me autorizim përmes portalit e-Albania.”- u shpreh Manastirliu.
Manastirliu në fjalën e saj ka theksuar se në kuadër të masave mbrojtëse për përhapjen e Covid është vendosur kufizimi i lëvizjeve dhe i aktivitetit të restoranteve, Fast Food-eve dhe lokaleve në shërbim të klientëve në ambientet e tyre nga ora 20:30 deri në 06:00 të mëngjesit.
Sipas saj kjo është një masë që hyn në fuqi nga data 24 dhjetor dhe me 5 janar do të rikthehet sërish fasha orare e mbylljes nga ora 22:00 deri në 06:00 të mëngjesit.
Masat e tjera:
Maska e detyrueshme në çdo ambient përveç shtëpisë. Ndalohen grumbullimet me më shumë se 10 persona në vende të hapura dhe të mbyllura. Ndalohen mbledhjet partiake dhe tubimet.
Konferencat, ceremonitë e festave, ceremonitë martesore dhe organizimet përtej familjare të ceremonive mortore, deri në një urdhër të dytë.
Pezullohen fluturimet nga Britania
Autoritetet shqiptare kanë vendosur të pezullojnë fluturimet nga Britania në Shqipëri nga nesër deri në datë 6 janar. Gjithashtu është vendosur që qytetarët që vijnë nga Britania në Shqipëri duhet të qëndrojnë 14 ditë karantinë. Lajmi u njoftua nga ministrja e Shëndetësisë Ogerta Manastirliu.
“Komiteti ka vendosur që të rekomandojë marrjen e masave të shtuara në mbrojtje të shëndetit publik. Autoritetet e Britanisë dhe vendet e BE-së po vlerësojnë impaktin e këtij varianti të ri të koronavirusit. Nisur nga rekomandimet për të kufizuar më tej riskun e përhapjes, kemi vendosur pezullimin e fluturimeve me Britaninë e Madhe duke filluar nga ora 6 e ditës së martë deri në 6 janar. Po ashtu vendoset masa e karantinës 14 ditore për qytetarët që vijnë nga Britania e Madhe” tha ministrja.
/Iconstyle.al/
