Leonora Moçka, 72 vjeç, humbi jetën 2 ditë më parë nga COVID-19, teksa sot është përcjellë për në banesën e fundit, pasi frika e përhapjes së koronavirusit ka bërë që në ceremoninë mortore mos të ketë të pranishëm.
72-vjeçarja banonte në fshatin Poro të Vlorës, por trupin për në banesën e fundit e kanë tërhequr familjarët në Fier, aty ku është zhvilluar edhe ceremonia mortore.
“Balkanweb” shkruan se viktima jetonte së bashku me bashkëshortin, i cili rezultoi negativ në testin e koronavirusit, por qendron i izoluar pasi kishin ardhur nga Italia ditë më parë.
Të moshuarit jetonin në Itali gjatë periudhës së dimrit, ndërsa ishin kthyer nga vendi fqinj rreth tre javë më parë.
Moçka ishte dërguar pak ditë me parë në Spitalin Infektiv në Tiranë, ndërsa mësohet se vuante edhe nga hipertensioni.
Gjatë 24 orëve të fundit janë regjistruar 15 raste të reja me koronavirus teksa janë testuar 111 persona të dyshuar, prej të cilëve janë konfirmuar 15 raste të reja.
Deri në këto momente, në total janë testuar 1,436 raste të dyshuara dhe prej tyre janë të konfirmuar pozitivë me COVID-19, 212 raste, teksa gjatë 24 orëve të fundit nuk është shënuar asnjë viktimë.
Në Spitalin Infektiv aktualisht janë 76 të shtruar, 6 prej të cilëve janë në terapi intensive, nga të cilët 4 janë të intubuar, ndërsa pjesa tjetër e të shtruarve në pavion janë në gjendje të stabilizuar deri në këto momente.
Sakaq, deri tani janë 40 të shëruar, të cilët pas testeve të kontrollit të kryera kanë rezultuar negativ.
