Ndonëse e gjithë bota prej javësh po lufton kundër të ashtuquajturit “armik i padukshëm”, Covid-19, mënyra e menaxhimit të situatës ndryshon nga njëri vend në tjetrin.
Deri tani jemi njohur me modele suksesi si Gjermania, Singapori apo Korea e Jugut, që përdorën si ‘armë’ testimin masiv apo Suedia që mori më pak masa nga të gjitha vendet e tjera europiane.
LEXO: Çfarë di Suedia që po vepron ndryshe nga e gjithë bota në këtë situatë pandemie?
“Shansi i humbur i Europës”. Katër “sekretet” e Singaporit kundër pandemisë
Mirëpo së fundmi, Australia e Jugut konsiderohet si një “ndër vendet më të sigurta në botë” sa i përket situatës së pandemisë, pasi shumë vende në Australi filluan procesin e ngadaltë të lehtësimit të kufizimeve.
Sipas mediave të huaja, australianët tani e gjejnë veten në një pozicion kaq të “rehatshëm”, kur vetëm një muaj më parë, numri i rasteve ditore në shkallë vendi arriti në shifra të trefishta.
Mirëpo, të premten i gjithë vendi raportoi vetëm 16 raste të reja, një rënie e mprehtë, nga kulmi i 460 infeksioneve të reja më 28 mars.
Scott Morrison, kryeministri australian, tha se javën që vjen do të shqyrtojnë masat lehtësuese.
“Australianët e kanë merituar këtë. Kemi nevojë të rifillojmë ekonominë dhe shoqërinë tonë”.
Në disa vende, kurba është rrafshuar plotësisht, siç është Queensland, ku nuk është raportuar ndonjë rast të ri që nga e hëna, dhe Australia e Jugut nuk ka konfirmuar ndonjë infeksion të ri për më shumë se një javë.
Por, për të arritur tek suksesi i Australisë në zbutjen e shpërthimit, duhet të përmendim se e gjitha filloi me masat e hershme, duke ndaluar hyrjet në zonat me rrezik të lartë, teksa më 1 shkurt, shteti australian mbylli kufijtë për të gjithë vizitorët e huaj që kishin qenë kohët e fundit në Kinë, ku shpërthimi u raportua për herë të parë në dhjetor të vitit të kaluar.
Më pas, Australia ndaloi hyrjet nga Irani, Koreja e Jugut dhe Italia në fillim të marsit, dhe më vonë mbylli plotësisht kufijtë e saj për shtetasit e huaj, shkruan CNN.
Gabimi i kontinentit-shtet ishte lejimi i më shumë se 2,600 pasagjerë të zbarkonin nga anija e lundrimit Ruby Princcess në Sidnei, që bëri që nga aty të regjistronin mbi 600 raste dhe 15 vdekje.
Kështu, më 22 mars të gjitha baret, klubet, kinematë, palestrat, dhe vendet e adhurimit, u mbyllën, ndërsa restorantet dhe kafenetë ofronin vetëm shërbimin “delivery”.
Deri në fund të marsit, autoritetet vendosën rregulla më të rrepta për distancimin shoqëror, duke kufizuar tubimin publik për dy persona nga 10, sa ishte më parë, teksa njerëzve u kërkohej të rrinin në shtëpi dhe të dilnin vetëm për “çështje themelore” siç është pazari për ushqim, ushtrime , dhe për arsye mjekësore.
Sakaq, një tjetër faktor suksesi është edhe testimi masiv, i provuar edhe në vende të tjera, si ‘rrugë shpëtimi’.
Deri më tani, më shumë se 570,000 teste janë kryer në të gjithë Australinë, sipas Departamentit të Shëndetësisë dhe nëse e krahasojmë me Mbretërinë e Bashkuar, që ka një popullsi më shumë se 2.5 herë më të madhe se Australia, ka realizuar 763,387 testime.
Më 25 mars, Australia zgjeroi kriteret e testimit duke përfshirë të gjithë punonjësit e kujdesit shëndetësor, punonjësit e kujdesit për të moshuar, të burgosur dhe njerëzit në vendet e tjera të identifikuar me ethe ose simptoma të frymëmarrjes akute.
