Situata me pandeminë në Kosovë nuk paraqitet aspak e mirë. Ajo që vihet re në spitalet e Kosovë është rritja e konsiderueshme e rasteve të pacientëve nën kujdesin intensivë për shkak të koronavirusit dhe variantit të ri “Delta” që është në qarkullim.
Sipas raportimeve të ditëve të fundit të shtunën ishin raportuar 73 pacientë ndërsa të dielën (5 shtator) ky numër është rritur në 87. Shërbimi Spitalor dhe Klinik Universitar i Kosovës (SHSKUK) tha se në spitalet dhe klinikat ku trajtohen pacientët me koronavirus janë të shtruar 1.207 pacientë, nga të cilët 1.101 janë të shtruar nga COVID-19.
Gjithashtu mësohet se 1.026 prej tyre janë në gjendje më të rëndë dhe po trajtohen me oksigjeno-terapi.
“Në Qendrën Klinike Universitare të Kosovës janë të shtrirë 418 pacientë të shtrirë, 413 prej tyre COVID-19 pozitivë, 354 me trajtim përmes oksigjeno-terapisë. Në spitalet e përgjithshme janë të shtrirë 789 pacientë, 688 të konfirmuar me COVID-19 pozitivë dhe 672 me oksigjeno-terapi”, thuhet në njoftimin zyrtar.
Kujtojmë se vetëm ditën e djeshme në Kosovë janë regjistruar 21 viktima nga koronavirusi. Gjithashtu sipas shifrave të fundit të publikuara nga Instituti i Shëndetit Publik në Kosovë vetëm ditën e djeshme janë regjistruar 1.278 raste të reja me variantin “Delta” të koronavirusit. Kjo shifër është bërë e ditur pasi janë kryer gjithsej në të gjithë territorin e Kosovës 10.609 testime. Raste aktive janë mbi 26 mijë. Ministri i Shëndetësisë, Arben Vitia nuk e ka përjashtuar mundësinë e masave të reja para 13 shtatorit, datë që janë në fuqi masat aktuale nga qeveria.
