Për shkak të situatës së krijuar nga koronavirusi, janë ndauar të gjitha prokurorimet publike, përveç atyre që lidhen me emergjencën COVID-19.
Ka qenë vetë Agjencia e Prokurimit Publik, e cila ka njoftuar këtë vendim.
“Në kuptim të sa më sipër, autoritetet kontraktore të pezullojnë gjitha procedurat e prokurimit, përfshirë këtu edhe procedurat e prokurimit me vlerë të vogël, për objekte prokurimi të cilat nuk lidhen ngushtësisht me këtë situatë, deri në një njoftim të dytë”, thuhet në njoftim.
Ky vendim vjen 24 orë pas deklaratës së kreut të PD, Lulzim Basha.
“Të ndalet çdo tenderim tjetër. Të ndalet çdo shpenzim tjetër dhe të gjithë paratë e shqiptarëve të shkojë në këto tre drejtime”, deklaroi Basha të martën.
Ky vendim prek edhe prokurimet që lidhen me riparimin e dëmeve të shkaktuara nga tërmeti i 26 nëntorit, për shtëpitë e atyre që kanë mbetur të pastrehë.
Pezullimi i prokurimeve ka bllokuar që prej të mërkurës, të gjithë funksionimin e shërbimeve të qeverisjes qëndrore dhe lokale, që tashmë nuk mund të bëjë asnjë blerje edhe për nevoja të domosdoshme.
“Gazetareforma.com” gjatë gjithë periudhës së epidemisë ka hulumtuar në lidhje me prokurimet e kryera, duke zbuluar abuzime të shumta, për gjëra jo të rëndësishme.
Një ndër to ishte edhe tenderi i OSHEE për maska mbrojtëse, i cili kapte shifrën e 12.6 milion lekëve të rinj.
Kjo shumë është e barabartë me 14.824 maska, nëse do të bliheshim me çmim pakice, duke ngritur kështu dyshime, se përse i duhen OSHEE kaq shumë maska.
Gjithashtu një tender tjetër abuziv gjatë periudhës së epidemisë, është edhe ai i Bashkisë së Tiranës për suvenire.
Tenderi përkon me datën 13 mars dhe ka një fond limit prej 2.496.200 lekësh, shumë kjo e përafërt me çmimin e një ventilatori për furnizimin me oksigjen të pacientëve.
Edhe pse ekonomia shqiptare është në krizë dhe nevojat mjekësore sa vijnë e rriten, bashkia më e madhe në vend, as nuk e mori mundimin që të anulonte tenderin.
Gjithashtu një ditë më herët Bashkia e Tiranës shpall një tjetër tender, kësaj here për rikonceptimin Kopshtit Zoologjik për shifrën 9.958.229 lekë, shumë kjo shumë herë më e madhe sesa ajo për suvenire.
Shqipëria në luftë me koronavirusin, Bashkia e Tiranës blen suvenire në mes të pandemisë
Së fundmi, PD ka njoftuar se do të çojë në SPAK Ministren e Mbrojtjes, Olta Xhaçka, për tenderin pa garë 1.5 milion euro të ushqimit.
Tenderi 1.5 milionë euro i ushqimit, PD çon në SPAK ministren Olta Xhaçka
