Teksa numri i të infektuarve nga COVID-19 në rang botëror ka shkuar në 212, 789 persona dhe numri i viktimave në 8,787 Italia vijon të plagoset çdo ditë e më shumë.
Në vetëm 24 orët e fundit janë regjistruar 474 viktima, duke e çuar numrin total të viktimave në 2,978 të vdekur.
Ndërkohë, janë regjistruar 2,648 raste të reja të personave të infektuar dhe tashmë janë 35,713 persona të prekur.
Kështu, Italia vazhdon të mbetet vendi më i prekur nga Coronavirusi në Europë ndërsa në renditje globale qëndron në vend të dytë pas Kinës, e cila numëron 80,894 të infektuar në total por trendi i rasteve të reja është në zbritje.
Ndërkohë, e gjithë Italia ndodhet prej ditësh në karantinë teksa qeveria italiane, ka nxjerrë një dekret të quajtur “Cura Italia”, ku 350 miliardë euro do të vijnë në ndihmë të familjeve dhe bizneseve.
Në vendin tonë deri tani kanë humbur jetën 2 person dhe janë infektuar 59 të tjerë, teksa në Kosovë janë 20 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
