Instituti Kombëtar i Shëndetësisë Publike të Kosovës ka bërë të ditur se janë regjistruar edhe gjashtë raste të reja me COVID-19 në Kosovë, duke e çuar në 132 numrin e përgjithshëm të të prekurve.
Sipas njoftimit për shtyp sot në Laboratorin e Mikrobiologjisë Molekulare në IKSHPK me metodën RT-PCR, janë testuar 105 mostra të marra nga rastet e hospitalizuara në Klinikën Infektive dhe 6 prej tyre kanë rezultuar pozitive.
Rastet e reja janë raste kontakti, katër prej të cilave janë me vendbanim në Llugagji të Pejës, një me vendbanim në Pejë dhe një i karantinuar.
Nga ana tjetër, janë shëruar edhe gjashtë pacientë dhe numri i përgjithshëm i të shëruarve deri më sot është 16.
Momentalisht Kosova, së bashku me Malin e Zi, ka përqindjen më të ulët të vdekshmërisë në rajon, pasi deri tani janë regjistruar vetëm 2 viktima: një 82-vjeçar që ndërroi jetë pas goditjes së vendit nga COVID-19 dhe një 47-vjeçar që ka ndërruar jetë 2 ditë më parë.
Mirëpo, duket se kriza politike ka bërë që situata të mos marrë vëmendjen e duhur, teksa parashikohet se këto ditë me rezultate të mira mos të zgjasë përgjithmonë dhe se situata mund të përkeqësohet.
Drejtori ekzekutiv i Programit të Emergjencës të Organizatës Botërore të Shëndetësisë, Michael Ryan ka thënë se sistemi shëndetësor në Kosovë është ende në gjendje të vështirë, teksa ka bërë thirrje të ndërmerren hapa në rast se situata eskalon.
