Ditën e sotme është regjistruar viktima e dytë nga COVID-19 në Kosovë, pasi një burrë 47-vjeçar i cili ishte shtruar në dializën e spitalit të Leposaviqit në Veri të Kosovës, ka ndërruar jetë teksa po transferohej në një spital në Nish të Serbisë.
Lajmi është bërë i ditur nga Drejtori i Zyrës për Kosovën në Qeverinë e Serbisë, Marko Gjuric, i cili ka njoftuar se gjendja shëndetësore e 47-vjeçarit është rënduar dhe ai është bërë personi i dytë që humb jetën në Kosovë për shkak të koronavirusit.
Po ashtu, pasditen e sotme një tjetër person ka rezultuar pozitiv në testin e koronavirusit, duke e çuar në 125 numrin e përgjithshëm të të prekurve.
Kosova, së bashku me Malin e Zi, renditen të fundit sa i përket shkallës së vdekshmërisë për shkak të COVID-19.
Mirëpo, duket se kriza politike ka bërë që situata të mos marrë vëmendjen e duhur, teksa parashikohet se këto ditë me rezultate të mira mos të zgjasë përgjithmonë dhe se situata mund të përkeqësohet.
Drejtori ekzekutiv i Programit të Emergjencës të Organizatës Botërore të Shëndetësisë, Michael Ryan ka thënë se sistemi shëndetësor në Kosovë është ende në gjendje të vështirë, teksa ka bërë thirrje të ndërmerren hapa në rast se situata eskalon.
