104 të infektuar dhe 4 viktima- ky është bilanci nga COVID-19 në vendin tonë, teksa bëhet me dije se 49 prej tyre janë të shtruar në Spitalin Infektiv.
Duke qenë se kjo javë është cilësuar si piku i pandemisë në vendin tonë, pritet që numri i të prekurve të rritet, e rrjedhimisht edhe nevoja për respiratorë.
Së fundmi, ministrja e Shëndetësisë dhe Mbrojtjes Sociale, Ogerta Manastirliu, në një deklaratë për mediat është shprehur se kontrata për blerjen e 54 respiratorëve është gati, teksa shtoi se po vijojnë procedurën për 100 respiratorë të tjerë, që do të mbërrijnë sipas një kalendari të mirëpërcaktuar.
“Po lidhim kontratën për blerjen e 54 respiratorëve dhe vijojmë procedurën për 100 respiratorë të tjerë, që do të mbërrijnë sipas një kalendari të mirëpërcaktuar”, tha Manastirliu
Ministrja e Shëndetësisë bëri të ditur edhe shtimin e stokut të mjeteve të mbrojtjes personale, ndërsa tha se kanë në gjendje 25 mijë maska dhe pritet furnizimi me 140 mijë maska.
Po ashtu, Manastirliu tha se po rritet me 10 mijë edhe stoku i veshjeve speciale dhe planifikojnë rritjen e tij me 50 mijë veshje.
“Me masat që kemi marrë kemi arritur të sigurojmë rritjen e stokut me 25 mijë maska dhe në vazhdim pritet furnizimi me 140 mijë maska, ndërkohë që planifikojmë krijimin e një stoku me plus 200 mijë maskash specifike. Sa i përket veshjeve speciale po rrisim në këtë javë me 10 mijë stokun e veshjeve dhe planifikojmë rritjen e stokut me 50 mijë veshje speciale”, bëri të ditur Manastirlu.
Sa i përket elementeve të tjerë doreza nitrili, syze mbrojtëse, helmeta mbrojtëse, dezinfektantë etj, po ashtu është siguruar stoku i nevojshëm për përballimin e kësaj situate dhe në vijim.
Ndër të tjera ministrja ka bërë me dije se po përfundon trajnimi i ekipeve që do të vendosen në shërbimet e triazhit në çadrat e ngritura para Urgjencës në QSUT.
Në fund, Manastirliu e mbylli duke u shprehur se po bëhet më e mira me kapacitet që ka vendi për t’u përballur me një virus i cili është shumë i rrezikshëm, teksa ka përsëritur apelin për kujdes dhe për të respektuar masat e distancimit social, të qëndrojnë në shtëpi, të ndihmojnë veten e tyre dhe të afërmit e tyre, sidomos ata që janë të moshuar, me sëmundje kronike dhe më të pamundur.
