Ministrja e Shëndetësisë, Ogerta Manastirliu është shprehur gjatë senacës së sotme plenare se të gjithë qytetarët shqiptarë do të pajisen me certifikatën e vaksinimit “Greenpass”, për të hyrë në lokale.
Manastirliu tha se shumë qytetarë në vende të Evropës mund të hyjnë në lokale vetëm nëse kanë certifikatën e vaksinimit “Greenpass”.
“Si hyhet në një lokal apo bar në Europë? A hyhet me ‘greenpass’? Do ta vëmë greenpass? Si shkohet në strukturat e tjera të shërbimit? Do ta vëmë ‘greenpass’. E vendosëm në universitete. Për qytetarët është me rëndësi që kemi më shumë se 1 mijë profesionistë të dedikuar për procesin e vaksinimit”, tha më tej Manastirliu.
Edhe pse ministrja shprehet se “Greenpass” është e detyruar për hyrjen në universitetet, në fakt studentët e pavaksinuar aktualisht mund të ndjekin mësimin në auditore .
Universitetet patën të drejtën të shfrytëzojnë autonominë e tyre dhe i pranuan studentët edhe nëse ato nuk ishin të vaksinuar, pra praktikisht pa bërë kontrolle të certifikatës së vaksinimit, ashtu sikurse ishte deklaruar se do procedohej.
Kujtojmë që bilanci i shifrave të Covid-19 në vend javët e fundit ka pasqyruar më shumë humbje jete dhe më pak raste të reja.
Covid-19 në Shqipëri nuk ka “kursyer” as fëmijët, ku ditën e sotme një 3- vjeçare në Berat ka humbur jetën si pasoje e komplikacioneve që i ka sjellur virusi, ndërkohë dy fëmijë të tjerë janë nisur në gjendje të rënduar nga Berati drejt spitalit Infektiv Tiranë.
