Disa ditë para dy sfidave shumë të rëndësishme për kualifikueset e Botërorit “Katar 2022”, pjesëtarë të Kombëtares Shqiptare të futbollit kanë rezultuar pozitiv me Covid-19.
Departamenti i Komunikimit në FSHF ka bërë me dije për mediat se ditën e djeshme është larguar nga grumbullimi mbrojtësi Erjon Hoxhallari si edhe fizioterapisti i Kombëtares, Arzen Voci. Të dy kanë rezultuar pozitiv me koronavirus pas testeve të kryera.
Hoxhallari dhe Voci janë larguar menjëherë nga hoteli ishin grumbulluar për t’u karantinuar. Mësohet se të dy janë në gjendje të mirë shëndetësore, ndërsa edhe lojëtarët e tjerë po i nënshtrohen testeve në mënyrë që të parandalohen infektime të tjera të mundshme.
Pra, Hoxhallari nuk do të jetë pjesë e Kombëtares në dy ndeshjet që janë vendimtare për Shqipërinë për të arritur zonën e play-off në kualifikueset e një Botërori për herë të parë në histori.
Dy ndeshjet e ardhshme do të jenë vendimtare për Shqipërinë e cila renditet e dyta në Grupin I, me 12 pikë pas 6 ndeshjesh. Ndeshja e parë do të jetë ndaj Hungarisë në transfertë më 9 tetor, ndërsa ndeshja tjetër do të jetë ndaj Polonisë më 12 tetor, në stadiumin “Air Albania”. Polonia është edhe rivali direkt i Shqipërisë në gurp për vendin e dytë.
