CIA ka publikuar ketë të shtunë një vlerësim të ri mbi origjinën e shpërthimit të COVID-19, duke theksuar se është më e mundshme që virusi të ketë rrjedhur nga një laborator kinez sesa të ketë kaluar nga kafshët.
Një zëdhënës i CIA-s tha se origjina e COVID mund të ketë lidhje me kërkimin për pandeminë dhe jo siç është pohuar më parë në raportet zyrtare.
Ky vlerësim është një nga të parët që publikohet nën drejtimin e John Ratcliffe, drejtorit të ri të CIA-s, i emëruar nga Donald Trump. Ratcliffe, i cili ka favorizuar prej kohësh teorinë e rrjedhjes së laboratorit, ka sugjeruar se COVID mund të ketë rrjedhur nga Instituti i Virologjisë Wuhan, që ndodhet 40 minuta larg tregut Huanan, ku u shfaq grupi i parë i infeksioneve.
Në një intervistë, Ratcliffe tha se ai dëshironte që CIA të braktiste qëndrimin e saj neutral për origjinën e virusit, duke lidhur këtë çështje me kërcënimin nga Kina dhe pasojat e pandemisë që shkaktuan vdekjen e një milion amerikanëve.
Megjithatë, zyrtarët e CIA-s thanë se ky vlerësim nuk bazohej në inteligjencë të re dhe ishte një rishikim i bërë gjatë administratës së Biden, i cili përfundoi para se Trump të merrte detyrën.
