Prej më shumë se një viti, pandemia e shkaktuar nga COVID-10, ka “zhdukur” normalitetin. Në përpjekje për t’u rikthyer në këtë normalitet, Singapori mund të bëhet shteti i parë në botë i cili nuk do t’i regjistrojë më rastet e infektuara me koronavirus.
Shteti në juglindje të Azisë, ka regjistruar vetëm 36 persona të vdekur që nga fillimi i pandemisë, duke zbatuar masa mjaft strikte për të frenuar përhapjen e shkallës së infeksionit.
Ndërsa tashmë, zyrtarët e lartë të këtij shteti synojnë që të heqin numërimin ditor të rasteve me koronavirus. Propozimi është bërë nga tri anëtarët kryesorë të Komitetit për Pandeminë në Singapor, për t’u dhënë fund 18 muajve me kufizime të rrepta. Deri më tani, Singapori ka regjistruar mbi 62 mijë raste të infektuara me koronavirus.
Në një deklaratë për shtyp të tri anëtarëve kryesorë të Komitetit për Pandeminë, u theksua që qëllimi i këtij vendimi, është t’i kthejnë jetën normale njerëzve: “Synimi është që t’i lëmë njerëzit të vazhdojnë me jetën e tyre duke hequr rregullat strikte dhe në vend të kësaj ta kontrollojmë virusin përmes mjeteve të tjera, të tilla si vaksinimi masiv. Në vend që të numërojmë rastet çdo ditë, ne do të përqendrohemi në rezultate”, thuhej në deklaratën e tyre.
