Me qëllim përballimin e pandemisë nga bizneset, qeveria shqiptare ka miratuar deri tani dy garanci sovrane.
Garancia e parë ishte me vlerë 11 miliardë lekë dhe mund të përdorej nga bizneset që duan të marrin kredi për të shlyer pagat e punonjësve deri në tre muaj.
Qeveria ka miratuar në mbledhjen e 13 majit të Këshillit të Ministrave garancinë e dytë sovrane me vlerë 15 miliardë lekë dhe me normë interesi deri në 5%.
Bizneset do të kenë mundësi të marrin deri në 300 milionë lekë, për investime dhe likuiditet dhe për 6 muaj nuk do të paguajnë principal, por vetëm interesin e kredisë.
Garancia sovrane është për sektorët e turizmit, fasonët dhe bizneset prodhuese dhe nuk do përdoret për paga, por për investime për të mbështetur rimëkëmbjen e aktivitetit tregtar.
Mirëpo, biznesi shqiptar është i pakënaqur nga mbështetja e qeverisë pas goditjes së marrë nga pandemia.
Kreu i Dhomës së Tregtisë dhe Industrisë Nikolin Jaka theksoi sot se sipërmarrja i ka dorëzuar qeverisë një plan me disa kërkesa që do të ndihmonin rimëkëmbjen e ekonomisë, teksa theksoi se fondet e garancisë të vëna në dispozicion nuk kanë funksionuar dhe qeveria duhet të miratojë një tjetër fond me interesa të ulëta nga 0 në 1%.
“Kemi nevojë për hartimin e një plani strategjik afatgjatë për një rimëkëmbjen e ekonomisë, krijimin e një fondi garancie. Kemi kërkuar që ky fond të jetë në shifrën 500 milion euro dhe interesat të variojnë nga 0 në 1%”, u shpreh ai.
Ndërsa për realizimin e amnistisë së pasurive kërkon më shumë dialog me grupet e interesit në mënyrë që të jetë më gjithëpërfshirëse.
“I jemi bashkangjitur iniciativës, por kemi kërkuar të ketë një dialog të plotë amnistia fiskale dhe shpresojmë që kjo amnisti fiskale të jetë gjithë përfshirëse dhe të inkurajojë të dekurajuarit. Nëse kjo amnisti fiskale do ketë një dialog dhe komunikim me të gjithë grupet e interesit duhet ta bindi edhe sipërmarrjen e ndershme të inkurajohet duke menduar që do kemi një formalizëm të ekonomisë dhe nuk do kemi më fenomene negative që e shqetësojnë ekonominë e vendit”, tha më tej ai.
Për të kthyer besimin se ekonomia dhe biznesi po i kthehet normalitet pas pandemisë, Dhoma e Tregtisë ka organizuar një panair ku do të marrin pjesë rreth 50 sipërmarrje të cilat do të prezantojnë produktet e tyre në sheshin “Skënderbej”.
