Bashkimi Europian ka prezantuar ditën e sotme paketën e ndihmës për Ballkanin Perëndimor dhe vendet partnere përballimin e pandemisë Covid-19.
Kjo paketë, që përfshin asistencën financiare të BE-së dhe Kreditë e Bankës Europiane të Investimeve, kap shifrën prej 3,3 miliardë eurosh dhe prej saj Shqipëria do të përfitojë një kredi 180 mln euro me kushte të favorshme.
Presidentja e Komisionit Evropian, Ursula von der Leyen , u shpreh se ata kanë përgjegjësi për të ndihmuar vendet ballkanike në këtë situatë, pasi e ardhmja e tyre është BE.
“Ne kemi një përgjegjësi të veçantë për të ndihmuar në këtë pandemi partnerët tanë në Ballkanin Perëndimor, pasi e ardhmja e tyre qëndron qartë në Bashkimin Evropian. BE po mobilizon një paketë të konsiderueshme financiare, duke konfirmuar solidaritetin e fortë. Së bashku do ta kapërcejmë këtë krizë dhe do të shërohemi. Dhe përtej kësaj, ne do të vazhdojmë të mbështesim rajonin, përfshirë reformat e nevojshme në rrugën e tyre në BE, pasi rimëkëmbja do të funksionojë në mënyrë efektive vetëm nëse vendet vazhdojnë të kryejnë angazhimet e tyre” tha ajo.
Nga ana tjetër, komisioneri për fqinjësi dhe zgjerim, Olivér Várhelyi theksoi se:
“Bashkimi Evropian veproi shpejt dhe gjithëpërfshirës për të mbështetur Ballkanin Perëndimor në adresimin e pandemisë COVID-19, me ndihmë të pashembullt financiare. Dhe puna jonë do të vazhdojë ndërsa përgatisim një Plan Ekonomik dhe Investimesh për rajonin, për të trajtuar ndikimin e vështirë socio-ekonomik të krizës, për të modernizuar ekonomitë në rajon, për të mbështetur reformat dhe për të filluar mbylljen e hendekut, duke sjellë kështu përfitime konkrete për njerëzit më shpejt” tha ai.
Vendet që përfitojnë kredi dhe shuma:
Shqipëria 180 milionë €
Bosnja dhe Hercegovina 250 milionë €
Gjeorgjia 150 milionë €
Jordania 200 milionë €
Kosova 100 milionë €
Moldavia 100 milionë €
Mali i Zi 60 milionë €
Maqedonia 160 milion €
Tunizia 600 milionë €
Ukraina 1.2 miliardë €
Kujtojmë se BE i dhuroi vendit tonë 50 milionë euro grante për përballimin e situatës nga Covid-19, prej të cilave 4 milionë janë për pajisjet mjekësore.
Sakaq, më 6 maj do të zhvillohet online samiti i Zagrebit mes vendeve të BE-së dhe Ballkanit Perëndimor.
