Teksa numri i të infektuarve nga Coronavirusi në Shqipëri ka shkuar në 38 persona, qeveria vijon të marrë masa të rrepta teksa sot është dita e fundit e ‘shtetrrethimit’, të nisur të premten në mëngjes.
Së fundmi, kryeministri Edi Rama ka publikuar një status në “Facebook” ku tregon hartën e vendeve europiane dhe reagimin e tyre ndaj COVID-19.
Sipas tij, në hartë shihet se sa shpejt ka vepruar Shqipëria në rang europian për ngadalësimin e përhapjes së Coronavirusit.
Ju kujtojmë se vendimi i parë që mori qeveria menjëherë me mbërritjen e COVID-19 në vendin tonë ishte mbyllja e shkollave dhe anulimi i aktiviteteve publike.
Ky vendim u pasua me mbylljen e vendeve publike, ndalimin e qarkullimit të mjeteve private, vendosja e postblloqeve në qytete të ndryshme me qëllim evidentimin e personave të ardhur nga Italia e që nuk vetëkarantinohen etj.
“NË KËTË HARTË QË TREGON KRONOLOGJINË E MBYLLJES SË SHKOLLAVE, MUND TË SHIHET SE SA SHPEJT KA VEPRUAR SHQIPËRIA NË RANG EUROPIAN!”, shkruan Rama.
https://www.facebook.com/edirama.al/videos/202539501063978/
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
