Në kuadër të masave të marra për parandalimin e përhapjes së COVID-19, Bashkimi Europian ka mbyllur kufijtë për të gjithë shtetet joanëtare për 30 ditë.
Kështu, shumë shqiptarë kanë ngelur në vende të ndryshme të zonës Shengen pa patur mundësi të kthehen në vendin tonë për të paktën 1 muaj.
Mirëpo së fundmi, Ministria për Evropën dhe Punët e Jashtme me anë të një njoftimi për media ka lajmëruar të gjithë shqiptarët që ndodhen në Gjermani apo Francë dhe kanë tejkaluar qëndrimin e lejuar në këto vende se nuk do të penalizohen për këtë fakt.
Në njoftim thuhet se për shtetasit shqiptarë që ndodhen në Francë, të cilët tejkalojnë qëndrimin e lejuar në hapësirën Schengen dhe dëshmojnë se për shkak të situatës së Covid-19 e kanë të pamundur lëvizjen, autoritetet franceze nuk do të vendosin asnjë penalitet.
Numri total i viktimave në rang botëror deri tani është 9, 377 persona dhe janë 228,687 të infektuar në 177 vende, teksa në Kinë në 24 orët e fundit për herë të parë që nga shpërthimi i virusit nuk është shënuar asnjë i infektuar.
Deri tani në vendin tonë kanë humbur jetën 2 persona dhe janë infektuar 64 të tjerë, teksa në Kosovë janë 20 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
