Teksa lajme të mirë vijnë nga Azia ku Kina i është rikthyer jetës normale, duket se Europa nuk ka arritur ende pikun e pandemisë.
Italia po kalon një situatë shumë të vështirë pasi mbi 2,500 persona kanë humbur jetën dhe rreth 31 mijë të tjerë janë infektuar.
Situata duket serioze edhe në Spanjë ku raportohet se 90 persona kanë humbur jetën në 24 orët e fundit për shkak të COVID-19, duke e çuar numrin total në 533 viktima, ndërkohë, 13, 910 persona janë infektuar nga virusi.
Nga ana tjetër, 1081 vetë janë shëruar nga Coronavirusi në shtetin spanjoll.
Sakaq, edhe në Kosovë është shënuar një tjetër person i infektuar duke e çuar numrin e të prekurve në 20 persona.
Në rang botëror deri tani janë shënuar of 8,272 viktima dhe janë regjistruar 206,900 të infektuar në 170 shtete, ndërsa në vendin tonë deri tani kanë humbur jetën 2 person dhe janë infektuar 59 të tjerë.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
