Pas shpalljes së Coronavirusit pandemi, Organizata Botërore e Shëndetit njoftoi se tashmë epiqendra e virusit është Europa.
Në kontinentin europian COVID-19 po përparon me shpejtësi duke shtuar një numër të madh të infektuarish e viktimash, teksa vendi më problematik mbetet Italia.
Shtetet kanë ndërmarrë masa të ndryshme, teksa kujtojmë se Italia ndodhet në karantinë, teksa Gjermania dhe Britania e Madhe janë treguar më pak strikte në masat e marra.
Ndërkohë, raportohet se ditën e sotme Bashkimi Europian po mendon të vendosë kufizime në udhëtimin jo shumë të rëndësishme drejt vendeve të Unionit për 30 ditë.
Lajmin e ka dhënë presidentja e KE Ursula von der Leyen nëpërmjet një reagimi në Twitter.
Sipas këtij plani, do bëhen përjashtime për qytetarët e BE-së që kthehen në shtëpi, për punonjësit e kujdesit shëndetësor, si dhe për shkencëtarët që punojnë në trajtime për virusin, si dhe për të ashtuquajturit punëtorë të kufirit, të cilët udhëtojnë përtej kufijve të BE-së për punët e tyre.
The @EU_Commission presents guidelines on border measures & proposes:
1⃣Green lanes/fast lanes giving priority to essential transport to keep the mobility sector going & ensure economic continuity
2⃣Temporary restriction on non-essential travel to the EU (30 days) pic.twitter.com/9bda9MntF0
— Ursula von der Leyen (@vonderleyen) March 16, 2020
Von Der Leyen tha se masa ishte e nevojshme për të parandaluar përhapjen e Coronavirusit, por nuk do të përfshijë Mbretërinë e Bashkuar, e cila doli nga BE në janar.
“Sa më pak udhëtime, aq më shumë ne mund të përmbajë virusin. Prandaj unë u propozoj krerëve të shteteve dhe qeverive të vendosin kufizimin e përkohshëm të udhëtimeve jo thelbësore në BE.”
Në rang botëror deri tani janë shënuar 6,687 viktima dhe janë regjistruar 174,940 të infektuar në 162 shtete, ndërsa në vendin tonë deri tani ka humbur jetën 1 person dhe janë infektuar 51 të tjerë, teksa në Kosovë janë 15 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
