Bordi i Transparencës ka vendosur që çmimi i naftës të rritet me 11 lekë, duke arritur në 258 lekë. Ky është sërish niveli më i lartë i regjistruar ndonjëherë, kur nafta për pak ditë shkoi rreth 260 lekë.
Lidhur me këtë rritje të frikshme të çmimit të naftës, ka reaguar gazetari Mentor Kikia. Me anë të një postimi në rrjetet sociale, gazetari Kikia përcjell mesazhe të forta, ndërsa shkruan se ky çmim është vetëm fillimi.
Sipas tij, ky nuk është çmimi real, por po bëhet një eksperiment, për të parë se deri ku mund të mbajë durimi i qytetarëve.
“Mos u dorëzoni, po na provokojnë!
Çmimi i karburanteve sot ka fluturuar afro 260 Lekë. Kjo ka shkaktuar zemërim dhe indinjatë të madhe në popull.
Në shumë rruge makinat u fiken në shenjë proteste.
Lokalet u boshatisen nga klientët.
Dhe së shpejti pritet që njerëzit të dalin në rrugë në protesta edhe të dhunshme
Por kujdes, mos u mashtroni. Çmimi nuk është real. Ata thjeshtë po bëjnë një eksperiment social, si ai që ka bërë dikur Harry Fultz me mishin e nxënësve në konvikt.
Ata duan të kuptojnë se deri kur mund të na mbajë durimi.
Ndaj duroni, të mos reagojmë, edhe kur të shkojë 3000 Lekë, që tua djegim eksperimentin.”-shkruan Mentor Kikia.
