Ditën e shtunë, Bordi i Transparencës në vend doli me një vendim të ri në lidhje me çmimin e karburanteve, duke vazhduar përsëri me absurditetin e tij
Kohët e fundit duket se qytetarët janë ‘mësuar’ me këto çmime dhe mungon qartazi reagimi dhe organizimi i tyre në protesta për të kundështuar këtë tallje që po iu bëhet nga një bord i cili asnjeherë të vetme nuk e ka reflektuar çmimin e bursës.
Duke marrrë parasysh pasivitetin e qytetarëve në raport me vendimet me rritjen e vazhdueshme të çmimit të naftës ka reaguar ashpër ish- deputeti i Partisë Demokratike, Myslim Murrizi. Ish-deputeti e konsideron popullin shqiptarë si gomerë për aq kohë sa nuk ka asnjë fjalë, asnjë reagim, asnjë kontestim, asnjë kundërshtim, asnjë veprim për çdo gjë që politika u vë në kurriz.
Gjithashtu, Murrizi me anë të një statusi në rrjetet sociale, ai deklaron se qytetarët vetëm ngrenë veshët përpjetë dhe durojnë çdo ngarkesë, duke pritur që dikujt në qeveri apo politikë, do t’ju vijë keq vetë.
“Në rresht dhe me veshët ngritur për të dëgjuar ndonjë ‘sukses’ tjetër të qeverisë përveç atij që ju dha bordi i mostransparencës për çmimin e karburantit. Asnjë fjalë, asnjë reagim, asnjë kontestim, asnjë kundërshtim, asnjë veprim për çdo gjë që politika ju vë në kurriz. Vetëm ngrënë veshët përpjetë dhe durojnë çdo ngarkesë, duke pritur që dikujt në qeveri apo politikë, do të ju vijë keq vetë. Sa kënaqën kur nuk i rrahin ose nuk i vrasin dhe harrojnë ngarkesën, kequshqyerjen, mashtrimin, papunësinë, fukarallikun, vuajtjet, dhunimin, përbuzjen, denigrimin që ju bëhet pothuajse çdo ditë. Çfarë ngjashmërie!!!”, shkruan ish-deputeti.
Vlen të kujtojmë që ishte Berisha ai që zhvilloi protestë me datë 7 korrik për rritjen e çmimeve, kur ndër të tjera qëllimi i protestës në mënyrë të pashmangshme kishte edhe nuanca politike.
Ndërkohë që më vonë janë zhvilluar 2 protesta për vdekjen tragjike të 7-vjeçares, Jonada Avdia në Himarë, e cila në mënyrë të pafajshme u godit nga një skaf, drejtuesi i të cilit ishte Arjan Tase, një efektiv policie. /Gazeta Reforma
