Zv/kryeministri arben Ahmetaj ka thënë se ditët në vazhdim kryeministri Edi Rama do të prezantojë planin e masave për të përballuar krizën energjetike, për të cilën ka paralajmëruar vetë disa ditë më parë.
Ahemtaj tha pas mbledhjes së qeverisë se plani do të mbrojë konsumatorin dhe biznesin familjar nga kriza e çmimeve dhe rritja e kostove.
“Çmimet lëvizin në vazhdimësi, çdo ditë. Një pjesë e mirë e vendeve e kanë transformuar koston te konsumatorët. Kryeministri ka ngritur një grup ndërinstitucional për të menaxhuar, monitoruar çdo moment ecurinë e situatës energjetike. Unë i referohem asaj që kryeministri ka thënë që vala e çmimeve ndërkombëtare prek edhe Shqipërinë, por ne jemi të bindur të gatshëm për të mbrojtur konsumatorin familjar dhe biznesin e vogël. Brenda javës kryeministri do të shpalosi vetë masat për mbrojten e qytetarëve dhe sipërmarrjes së vogël dhe në nevojë të qetësimit publik, ne do të vijojmë të mbrojmë konsumatorin familjar nga kriza e çmimeve dhe rritja e kostove për shkak të këtyre çmimeve”, deklaroi Ahmetaj.
Zv/kryeministri e mohoi një rritje të çmimit të energjisë dhe bëri me dije se është ngritur një grup ndërinstitucional që monitoron dhe menaxhon situatën për ditë. Ahmetaj tha se çmimet po monitorohen dhe kryeministri do të dalë me një paketë të plotë në ditët në vijim.
Kompanitë janë duke punuar vazhdimisht për të siguruar energji elektrike, gjë që dua ta ndaj me qytetarët që sigurisht është e garantuar dhe qytetarët do të vijojnë të mbrohen, ashtu si dhe familjarët dhe sipërmarrjet e vogla. I garantoj qytetarët dhe sipërmarrjen e vogël që do të mbrohen nga qeveria. Paketa specifike do të lancohet nga kryeministri në ditët që vijnë. Dua ta ritheksoj se kryeministri ka krijuar një grup ndërinstitucional që monitoron dhe menaxhon situatën për ditë. Çmimet e energjisë nuk po rriten. Ne po i monitorojmë dhe kryeministri do të dalë me një paketë të plotë në ditët në vijim, që do të jetë mbështetëse për familjarët dhe sipërmarrjen e vogël”, ka thënë Ahmetaj.
