Mania e të rinjve për rrjetet sociale duket se kalon edhe parimet profesionale të cilat duhen respektuar me rigozitet.
Një rast i tillë ka ndodhur në Elbasan, ku një infermiere ka publikuar në rrjetin e saj social “TikTok” pamje të rënda dhe njëkohësisht sensitive nga puna e saj. Vajza e identifikuar në rrjet vetëm me emrin Silvana ka publikuar video të rënda në TikTok gjatë kryerjes së punës së saj në repartin e Kirurgjisë në spitalin e Elbasanit. Madje ka shkuar deri aty saqë, përveç fotove dhe videove nga salla e lindjes, ka treguar embrionin e një foshnje pas abortit dhe më pas e ka fshirë. Pamjet janë të rënda dhe kanë marrë shumë kritika nga ndjekësit e të resë që vazhdon studimet në Fakultetin e Shkencave Mjekësore, e cila më pas vendosi që t’i fshinte.
Ndërkohë, pas publikimit të lajmit lidhur me rastin ka reaguar vetë për “JOQ Albania” infermierja Silvana C. Ajo shkruan se videoja është marrë nga interneti dhe se e ka postuar pa dashje në rrjetin e saj social. Por duhet theksuar se nga kërkimi i bërë në rrjet, motorët e Google nuk e kanë vërtetuar deklaratën e infermieres se janë pamje të marra në internet.
