Gazetari Çim Peka ka reaguar në lidhje me “zhdukjen” disa orëshe të ish-zv.drejtorit të AKSHI-t, Daniel Shima, duke deklaruar se është ai që i ka shpëtuar jetën.
Në një postim, Peka shkruan se nëse nuk do të kishte publikuar një vit më parë intervistën me Arben Ahmetajn, ku përmendej edhe emri i Shimës, ky i fundit sot nuk do të ishte gjallë.
“Një gjë është e sigurt: pa denoncimin e Arben Ahmetaj para një viti tek unë, Daniel Shima nuk do ishte pajtuar me bashkëjetuesen. Do ishte akoma në ‘plazh’ në Jug ose ushqim për peshkaqenët. Prandaj Daniel, me partneren u pajtove falë Benit e moscensurimit nga unë. Na e ke një borxh si TV, një rrëfim si u ndjeve larg partneres për 10 orë? A ja ndjeve mungesën? A doje të ktheheshe më herët? Pse nuk i more prindërit gjatë këtyre 10 orëve që t’i qetësoje? Klientët e partneres si avokate a ndikuan sadopak në sheshimin e mosmarrëveshjeve me partneren që të riktheheshe nga ‘plazhi’? Ke plot për të rrëfyer”, shkruan Peka.
Deklarata e tij vjen pas debatit publik mbi rastin Shima, i cili për disa orë humbi kontaktet, duke ngritur dyshime për sigurinë e tij, përpara se të shfaqej sërish.
