Sokol Cikalleshi ka vazhduar me formën e mirë në Turqi. Ai e ka ndihmuar skuadrën e tij, Konyaspor, që të marrë një pikë në udhëtim te Istanbul Basaksehir.
Cikalleshi shënoi golin e parë në këtë takim në minutën e 79’, pas një asisti nga ana e mesfushorit 24-vjeçar nga Kosova, Zymer Bytyqi. Por, Konyaspor nuk arriti të ruajë epërsinë dhe në minutën e 85’, vendasit barazuan gjithçka me anë të ish sulmuesit të Chelseat, Demba Ba.
“Sot goli me kokë, për pak dhe shtyllë me kokë. Faleminderit Zot, faleminderit Konyaspor, vazhdojmë përpara të bashkuar”, shkroi ai në Instagram.
Sokol Cikalleshi tregon kësisoj edhe formën e mirë që po kalon, një lajm i mirë edhe për Kombëtaren kuqezi. Cikalleshi ishte nën kontratë me Akhisar në Turqi, por klubi nuk u ngjit këtë sezon në Superligë dhe si rrjedhojë u privua nga shqiptari nën trysninë e ofertave që mori. Futbollisti u prezantua në një konferencë me pak pjesëmarrës për shkak të pandemisë.
Sokol Cikalleshi kaloi me sukses teste mjekësore në Medicana Konya Hospital dhe më pas firmosi deri në vitin 2022. Bomberi kuqezi do të mbajë fanelën me numrin 17 te Koniaspor. Ai ka luajtur në total 303 ndeshje si profesionist duke shënuar 92 gola në të gjitha kompeticionet.
