Ishin zhdukur jashtë shtetit pasi u kishin marrë një thes me para bashkëqytetarëve të tyre, por nuk arritën që t’i gëzonin.
Kjo është historia e çiftit nga Shkodra, Zamir dhe Bukurije Kalej, që u arrestuan një ditë më parë pasi ishin shpallur në kërkim nga policia për mashtrim në shuma të mëdha parash.
Ky çift ka një histori mashtrimi mbi shpinë dhe ngjan me ato të skenarëve të filmave amerikanë.
Dyshja nga Shkodra, ishin në kërkim prej 5 vitesh, pas vendimit që kishte dhënë në mungesë Gjykata e Shkodrës, duke i dënuar në mungesë me nga pesë vite burg secilin.
Por çfarë ndodhi në vitin 2015?
Zamir Kalej, 53 vjeç dhe Bukurije Kalej, 48 vjeçe (bashkëshortë), në vitin 2015 i kanë marrë shtetasit Jakup H. shumën prej 12 milion lekësh të rinj në formën e huas, me premtimin se do t’ia kthenin brenda një periudhe 6 mujore.
Por, krejt papritur çifti u larguan jashtë shtetit duke mos ja kthyer paratë Jakupit asnjëherë. Huadhënësi, më 11 dhjetor të vitit 2015, Jakup H. ka paraqitur kallëzim penal në Prokurori kundër bashkëshortëve Zamir Kalej dhe Bukurije Kalej, duke treguar se më 25 gusht të po atij viti u ka dhënë hua të kallëzuarve një shumë prej 12 milionë lekësh të rinj, bazuar në një kontratë noteriale.
Ai ka rrëfyer para grupit hetimor se, dy të pandehurit kishin vënë pasurinë e paluajtshme, nëpërmjet së cilës do të garantohej përmbushja e detyrimit ndaj tij, gjë që nuk u bë asnjëherë.
Nga ky moment ata u shpallën në kërkim dhe u dënuan në mungesë. Por, ky nuk ishte rasti i parë që çifti nga Shkodra kryenin një mashtrim të tillë.
Bashkëshortët Kalej, para 12 milionë lekëve të marra borxh nga Jakup H., i kanë marrë një shumë prej 60 mijë dollarësh amerikanë dy personave të tjerë, duke u kthyer në historinë e një “Bonnie and Clyde”, të zhvilluar në Shkodër.
Në dosje, dy personat e tjerë, identifikohen si Gjon L. dhe Sokol M. Tashmë, dyshja do të përballen me dënimin prej 5 vitesh burrg.
/GazetaReforma.com/
