Prej vitesh aferat korruptive të qeverisë me oligarkët i kanë shkatërruar pasuritë natyrore të Shqipërisë dhe i kanë varfëruar edhe më shumë qytetarët. Njëjtë ka ndodhur edhe me lumin Zall-Gjoçaj në Mat. Prej disa kohësh aty po kryhen punime nga kompania koncesionare “Seka-Hidropower” për ndërtimin e HEC-it të Sekës. Banorët e zonës i kanë kundërshtuar që prej fillimit këto punime, me pretendimin e drejtë se do të shterojnë burimet ujore. Por veçase ka dëmtuar natyrën, firma private ka dëmtuar edhe varezat 500-vjeçare në fshatin Melth, në hyrje të Parkut Kombëtar Zall-Gjoçaj.
Kanë qenë një grup aktivistësh që e kanë vënë në dukje problemin, ndërsa vetë banorët kanë treguar për “Citizens Channel” vendet ku firma ka hedhur gurë dhe inerte në varret e vjetra. Avokatja e banorëve të Matit Dorina Ndreka ka thënë se ndër të tjera banorët e zonës vuajnë mungesën e ujit të pijshëm dhe se i kanë dërguar një ankesë Bashkisë së Matit për problemin në fjalë.
Punimet për hidrocentralet në Zall-Gjoçaj mbulojnë me gurë dhe inerte varrezat 500-vjeçare
Kompania private që po bën ndërtimet mbi lumin Zall-Gjoçaj ka qenë deri në vitin 2013 në pronësi të oligarkut” të Bashkim Ulaj dhe firmës së tij “Gener2”, ndërsa sot zotërohet nga shoqëria HYDRO-PROJECT dhe ka për administrator Sokol Mucekun dhe Fabio Scuero. Kujtojmë që firma Gener 2 u përfshi edhe në aferën e Unazës së Madhe, ku dolën në dritë skandale korruptive që kishin të bënin me miliona euro.
Nga ana tjetër institucionet lokale në Mat nuk kanë asnjë reagim për këtë katastrofë që po ndodh me natyrën dhe për cenimin ekonomik e moral që po i bëhet banorëve të zonës. Agron Malaj, kryebashkiaku i Matit nuk ka asnjë fjalë ndaj oligarkëve. Ndoshta sepse ky i fundit është vetë i përfshirë në ngjarje edhe më të rënda. Malaj ishte pjesë e “grupit të zjarrit” të gardistëve të 21 janarit që qëlluan mbi protestuesit. Edhe pse u shkarkua nga detyra në vitin 2013, ai u shpërblye me një post edhe më të favorshëm nga kryeministri Rama, sipas të cilit “Malaj nuk kishte lidhje me ngjarjen”.
