Situata e pandemisë është rënduar ndjeshëm ditët e fundit në vendin tonë me shifrat ditore që i kalojnë 1 mijë raste pozitive. Për herë të parë që nga fillimi i pandemisë, 90% e shtretërve në spitalet COVID janë të zëna duke rrezikuar kolapsin shëndetësor. Mdërkohë, në siptalet rajonale nuk ka nisur ende trajtimi i pacientëve të infektuar.
Ditën e djeshme në njoftimin e Ministrisë së Shëndetësisë thuhej se nga 500 shtretër janë zënë 492. Nga pacientët e shtruar 32 janë në terapi intensive, ndërsa 19 prej tyre janë të intubuar. Pritet që në ditët në vazhdim të hapen edhe spitalet rajonale per trajtimin e Covid, fillimisht në Elbasan, Vlorë e më pas në qytetet e tjera te vendit. Sipas Ministrisë së Shëndetësisë ato kanë në dispozicion 1600 shtretër. Vetëm ditën e djeshme në vendin tonë janë regjistruar 1105 raste të reja me koronavirus, ndërsa që prej fillimit të pandemisë kanë humbur jetën 1517 persona, nga këta 14 kanë humbur jetën vetëm gjatë ditës së djeshme.
Ditën e djeshme hynë në fuqi edhe masat e reja kufizuese për parandalimin e përhapjes së virusit. Ora policore u afrua nga ora 22:00 e mbrëmjes, në orën 20:00. Pas kësaj ore ndalohet qarkullimi dhe bizneset, baret e restorantet pas ëksaj ore duhet të jenë të mbyllura.
