Operacioni i zhvilluar nga SPAK në bashkëpunim me autoritetet spanjolle ka çuar në një seri arrestimesh, me të paktën shtatë persona të ndaluar deri tani.
Aksioni ka përfshirë disa qytete, por epiqendra duket të jetë zona e “Kodrës së Diellit” në Tiranë.
Një nga gjetjet kryesore të hetimit ishte një laborator kokaine në Qerekë të Fushë Krujës, ku janë sekuestruar sasi të konsiderueshme të kësaj lënde narkotike.
Disa nga të arrestuarit janë kapur në zonën e “Kodrës së Diellit,” ndërsa detaje të mëtejshme rreth aksionit dhe identiteteve të të ndaluarve ende nuk janë bërë publike, pasi SPAK dhe Policia e Shtetit nuk kanë dalë në një deklaratë zyrtare.
Sipas burimeve, shtetasit e huaj ishin ekspertë për përzierjen e kokainës, ndërkohë që ka dyshime se grupi operonte në Shqipëri prej një kohe të gjatë. Po kështu sasia e drogës së sekuestruar nuk është përcaktuar ende, pasi është e papërpunuar.
Ky hetim ka ndodhur në kuadër të një bashkëpunimi ndërkombëtar, duke treguar një përpjekje të përbashkët për luftën kundër trafikut të drogës.
