Në një prononcim për mediat, pronarja e restorantit që u përfshi nga flakët në orët e para të së enjtes në Theth, Aida Gjeçaj, hodhi dyshime mbi shkakun e zjarrit, duke përjashtuar mundësinë e një shkëndije elektrike dhe duke lënë të kuptohet se pas ngjarjes mund të fshihet diçka tjetër.
Sipas saj, kur zjarrfikësja mbërriti në vendngjarje, dritat në objekt ishin ende të ndezura, çka sipas saj përjashton versionin zyrtar për një defekt në rrjetin elektrik.
“Ekspertët thonë se energjia nuk ishte shuar fare, edhe pse godina ishte në flakë, gjë që përjashton shkëndijën elektrike”, u shpreh Gjeçaj.
Ajo nënvizon se ka qenë e kujdesshme për të mos ndërtuar pa leje dhe se nuk është në listën e subjekteve të prekura nga aksioni i IKMT-së në zonë.
“Unë nuk kam dyshime, nuk kam askujt borxh, s’kam pas as kërcënim as gjë, dhe nuk di pse ka ardhur. Unë jam një bujtinë me 5 dhoma, pasi s’kam dashur të ndërtoj asgjë pa leje, por s’di kujt t’ja vë gishtin. Koncidenca me aksionin në Theth është e keqe, sepse unë nuk kam procedim për prishje, pasi nuk kam ndërtime ose objekte pa leje”, theksoi ajo.
Pronarja tha gjithashtu se ndodhej në Tiranë në momentin që ra zjarri dhe se ishte njoftuar rreth orës 02:00 të natës.
“Kur më njoftuan në dy të natës që kishte rënë zjarri në subjektin tim, u nisa dhe erdha. Komshinjtë kanë ndërhyrë sa kanë mundur, por s’kanë arritur të shpëtojnë asgjë”, tha Gjeçaj.
Ajo falënderoi fqinjët për ndihmën në përpjekje për të shmangur përhapjen e zjarrit dhe shtoi se fatmirësisht nuk pati dëme në njerëz.
“Zjarrfikësja nuk ka arritur të vijë në kohë, por gjithsesi ka mbërritur. Falenderoj komshinjtë që kanë ardhur për të evituar shpërndarjen e zjarrit. Falë Zotit, nuk ka pasur dëme njerëzore, as nga familjarët, as nga turistët”, tha ajo.
Gjeçaj u shpreh se ka investuar me shumë mund në këtë biznes të vogël turistik, ndërsa vlerësoi dëmin e shkaktuar nga zjarri në rreth 150 mijë euro.
“Dëmi mund të jetë rreth 150 mijë euro, ja lë në dorë drejtësisë, por s’është nga energjia”, përfundoi ajo.
