Në Apelin e GJKKO-së u zhvillua seanca e së martës për Laert Haxhiun, i cili ka kundërshtuar dënimin e tij me burgim të përjetshëm nga shkalla e parë.
Në sallë ishin të pranishëm vetëm prokurori Altin Dumani dhe avokati mbrojtës Detar Hysi, ndërsa i pandehuri Haxhiu nuk mori pjesë në seancë.
Avokati Hysi kërkoi që vendimi i shkallës së parë të rishikohej, duke argumentuar se klienti i tij është i pafajshëm.
Ai kërkoi prishjen e vendimit dhe dërgimin e çështjes për rigjykim nga një trup gjykues tjetër.
Altin Dumani: Vendimi i shkallës së parë është i drejtë dhe duhet të mbetet në fuqi. Janë trajtuar si provat e prokurorisë, ashtu edhe provat e paraqitura nga mbrojtja. Sa i takon zbatimit të ligjit, ne gjykojmë se është vendim i drejtë. Përsa i përket pretendimit të të pandehurit dhe mbrojtjes së tij për rihapjen e shqyrtimit gjyqësor, ne vlerësojmë se kjo gjykatë me të drejtë e rrëzoi kërkesën. Prokuroria i është referuar pamjeve filmike në pikën e karburantit Gulf, jo pamjeve të sjella nga babai i Zamir Latifit. Nuk ka vend për të vënë në dyshim vërtetësinë e provave. Edhe për pamjet filmike janë pyetur dëshmitarët e thirrur nga mbrojtja dhe nga akuza. Vrasja e Zamir Latifit dhe Jurgen Hoxhës nuk kishte asnjë motiv, por ndodhi sepse shënjestër ishte Xhuljo Shkurti, për shkak të konfliktit që Laert Haxhiu kishte me të. I pandehuri, në mënyrë të përsëritur, në shkallë të parë dhe këtu në Apel, ka thënë se nuk jemi përpara një grupi kriminal. Ne sqarojmë se u provua ekzistenca e grupit të strukturuar kriminal. Mes Laert Haxhiut dhe Xhuljo Shkurtit ka pasur një konflikt që ka zgjatur ndër vite.Shkalla e organizimit është e lartë. Ata sigurojnë informacion për hyrjen në Shqipëri të Xhuljo Shkurtit, sigurojnë armët e zjarrit etj.
Apeli i GJKKO lë në fuqi vendimin e shkallës së parë për dënimin me burg të përjetshëm për Laert Haxhinë.
