Elsa Bita mbështetësja dhe aktivistja e Partisë Demokratike, e cila pretendon se është dhunuar nga shefi i komisariatit të Divjakës ka publikuar në rrjetet sociale pjesën e ambienteve të jashtme të një lokali ku sipas saj Partia Socialiste po zhvillon një takim elektoral.
Bita ka publikuar videon dhe në video dëgjohet të thotë se “Këto janë makinat e administratës dhe po bëhet mbledhje në lokal. Ka zbarkuar gjithë administrata dhe nuk ke vend ku të parkosh. Brenda lokalit është plot dhe kjo është e palejueshme. Po pres policinë për të parë nëse dot a pezullojë aktivitetin apo jo. Janë të gjithë të PS”.
Në videon e publikuar nga qytetarja duket se në ambientet e një lokali janë mbledhur disa qytetarë, që sipas saj janë simpatizantë të Partisë Socialiste dhe punonjës të administratës.
Qytetarja është afruar edhe pranë lokalit, por nuk e kanë lejuar. Ndërkohë pak minuta më vonë ka mbërritur edhe shefi i komisariatit.
Pas publikimit te këtyre pamjeve, qytetarja është dhunuar.
Kujtojmë se për rastin në fjalë patëm një reagim nga kryetari i Partisë Demokratike në Divjakë, Saimir Korreshi, njëherësh edhe kandidati i PD-së për këtë zonë. Sipas tij, vajza e cila është dhunuar ka dashur të denoncojë se Partia Socialiste ka zhvilluar një takim elektoral në ditën e heshtjes zgjedhore. Pak minuta më parë edhe Presidenti i Republikës, Ilir Meta i ka bërë thirrje SPAK që të nisi menjëherë hetimet.
