Zyrtarët më të lartë të shtetit janë mbledhur së bashku gjatë këtyre dy ditëve në qytetin e Vlorës, për homazhet e përkujtimit të 100-vjetorit të “Luftës së Vlorës”.
Në ceremoninë e përkujtimit ka marrë pjesë edhe kryeministri Rama, presidenti Meta dhe kryeparlamentari Ruçi.
Pas ceremonisë mëngjesin e sotëm të zhvilluar në Qafën e Koçiut, Rama ka folur edhe për çështjen e detit me Greqinë.
Kryeministri ka theksuar se nuk do ketë marrëveshje me palën greke për këtë çështje, pa marrë fillimisht miratimin e presidentit Meta.
“Nuk mund të ketë një marrëveshje për detin me Greqinë pa miratimin e presidentit Meta. Është presidenti ai i cili firmos marrëveshjen dhe më pas presidenti ka mundësinë ta dërgojë dhe apelojë në Gjykatën Kushtetuese. Një deklaratë ngatërresë e ish-presidentit grek ka bërë që e gjithë situata të ngatërrohet por në këtë situatë nuk ka asgjë të vërtetë. Nuk mund të bëhet asgjë pa miratimin e presidentit dhe kushdo që i ha këto gjëra është thjesht trupeshk”, ka thënë kryeministri Rama
Kryeministri grek, Kyriakos Mitsotakis deklaroi në parlamentin grek pak ditë më parë, se Greqia do të zgjerohet me 12 milje në Jon.
Deklarata e Mitsotakisit solli një pështjellim në politikën shqiptare, ku mazhoranca dhe opozita shkëmbyen replika dhe akuza ndaj njëri-tjetrit.
Partia Demokratike akuzoi Ramën se po bënte marrëveshje të fshehtë me Greqinë dhe po tentonte që t’i falë territore. Ndërkohë nga ana tjetër, kryeministri Rama ka deklaruar se nuk ekziston asnjë marrëveshje midis Greqisë dhe Shqipërisë, pasi bisedimet janë ndalur që prej ndërrimit të qeverisë helene.
Kryeministri ka sqaruar se më parë duhet të reformohet grupi negociator për çështjen e detit me Greqinë, dhe emrat së pari duhet të kalojnë nga tryeza e Metës.
