Ditën e sotme Gjykata e Lartë ka vendosur të lërë në fuqi vendimin e Gjykatës Speciale Kundër Korrupsionit dhe Krimit të Organizuar (GJKKO) në lidhje me pushimin e hetimit për ish-kreun e KED-së, Ardian Dvorani.
Kujtojmë se pas vendimit të GJKKO, e cila vendosi të pushojë çështjen e Ardian Dovranit, ish-Presidenti i Shqipërisë Ilir Meta asokohe vendosi që të bëjë rekurs në Gjykatën e Lartë, ndërkohë që këtë të premte kjo e fundit la në fuqi vendimin e Gjykatës së Posaçme Kundër Korrupsionit dhe Krimit të Organizuar.
Konfliti mes Metës dhe Dovranit nisi për emrat e kandidatëve që do të emëroheshin në Gjykatën Kushtetuese, ku Meta e akuzoi Dvoranin për veprat “shpërdorim detyre” dhe “përvetësim i titullit”.
Meta pati një përplasje me Dvoranin pas interpretimeve të ndryshme të Kushtetutës për zgjedhjen e anëtarëve të rinj të Gjykatës Kushtetuese. Meta, asokohe President i Republikës së Shqipërisë, pretendoi se kreu i KED-it kishte shkelur Kushtetutën duke mos respektuar radhën e emërimeve. Ndërkohë Dvorani dhe shumica parlamentare menduan se Meta shkeli Kushtetutën duke dekretuar Marsida Xhaferllarin si gjykatëse edhe pse kishte humbur afatin 30 ditor të përcaktuar në ligj.
Asokohe, Dvorani iu përgjigj kallëzimit me një komunikim të gjatë për mediat, duke e konsideruar atë “shantazhues”.
