Komisioni i Veprimtarive Prodhuese, ka arritur që të miratojë sot projektligjin në lidhje me censusin e popullsisë.
Mësohet se draft projektligji i depozituar në Kuvend që prej vitit 2018, por kishte mbetur pezull për shkak të pandemisë së Covid-19.
Ky projektligj do të synoje dhe regjistrin kombëtar të popullsisë dhe të banesave në të gjithë territorin e Shqipërisë.
Në këtë census, etnia dhe përkatësia fetare sërish janë cilësuar si çështje sensitive dhe do të jenë me dëshirë, teksa gjuha do të jetë detyrim ligjor për qytetarët për t’u përgjigjur në pyetësor.
Relatori i këtij draft projektligji, Ilir Beqja, ka kërkuar nga INSTAT që ekspertët teknikë të këtij procesi, të jenë të ndryshëm nga censusi i bërë në vitin 2011, për shkak të çështjes së nxehtë të minoriteteve.
Kujtojmë se ky është censusi i tretë që do të zhvillohet në Shqipëri, pas censusit të zbatuar në vitin 2001 dhe më pas në 2011 ku popullsia e Shqipërisë përllogaritej në mbi 2.8 milionë banorë.
Ndërkohë për qytetarët që refuzojnë që të japin informacione apo i deklarojnë ato të rreme, projektligji parashikon edhe masa ndëshkimore që variojnë nga 10 deri në 100 mijë lekë gjobë.
Gjithsesi për shkak të situatës nga pandemia, duket që sërisht ky projektligj do të mbesi pezull, pasi procesi për censusin parashikon vizitat derë më derë për plotësimin e pyetësorit, që këtë vit do të zhvillohet në një formë ndryshe, përmes tabletave./Iconstyle.al/
